— Dette var heilt fantastisk. Det var konsert i verdsklasse, seier festivalsjefen Alf Warloe Christophersen dagen etter den store konserten. Han er svært nøgd med fredagens konsert, men hadde håpa på endå fleire besøkjande til festivalteltet fredag kveld.
— Me selde rundt 1500 billettar. Det kunne vore meir folk, men dei som møtte fekk ei flott oppleving, seier han.
Første gong i Noreg
Bandet Gov’T Mule har servert blues-og sørstatsrock sidan 1995 og har hatt over 1300 konsertar rundt om i verda. Dei har selt over 1 milliom album og har over 1,5 millionar nedlastingar frå heimesida si. Konserten i Skånevik er deira første i Noreg og står på årets turneliste saman med England, Tyskland og Spania.
Stor stemning
Skånevik Bluesfestival har gått etter planen og vergudane har så langt spelt på lag.
— Her er masse folk og flott stemning. Det sig inn med folk heile tida. På House og Blues er det fullt kjør. Alt har gått veldig fint, seier ein nøgd festivalsjef som melder om masse båtar i båthamna og ein full camping.