Privatpersonar frå land observerte tysdag kveld denne veke tjuvfiske frå Alsaker Fjordbruk sitt lakseoppdrett utafor Ebnehanen på Skånevikstranda.
Vitne fortel til Grannar at det var to båtar i aksjon den lyse sommarkvelden. Dei la seg like inntil merden og fiska oppi. Etter ei stund forsvann båtane i retning Skånevik, med ein skokk måkar etter seg, noko som tyder på fangst i båten.
For Alsaker Fjordbruk som har fleire oppdrettsanlegg i distriktet, er dette eit stort problem som stadig går igjen. Spesielt sommartid skjer aktiviteten hyppig.
Alle fiske i og rundt oppdrettsanlegg er forbode. Fiskeforbodet gjeld i ein radius på hundre meter frå anlegget. I tillegg er det ikkje tillate å ferdast i båt nærare merden enn 20 meter.
Saka er førebels ikkje meldt til politiet.