Statsadvokaten i Rogaland har lagt vekk valdtektssaka frå Vikedal i fjor sommar. Det opplyser påtaleansvarleg Brita Lysaker ved Sør-Vest politidistrikt. Ho har orientert partane via eit brev som vart sendt til dei før helga.
Det var natt til 18. juli i fjor at ei kvinne i slutten av tenåra kontakta ein politipatrulje som var i Vikedal i samband med rootsfestivalen, og skal ha forklart at ho hadde vore utsett for eit seksuelt overgrep. Hendinga skal ha funnen stad utanfor festivalområdet, i eit køyretøy i nærleiken av kyrkja. Ein mann i byrjinga av 20-åra vart gripen kort tid etter at jenta meldte forholdet til politiet.
Politiet har tidlegare opplyst til Grannar at den sikta og den fornærma jenta har hatt motstridande forklaringar om kva som hadde skjedd. Politiet gjorde fleire avhøyr i saka, og det vart sikra tekniske spor. Påtaleansvarleg Brita Lysaker vil ikkje kommentere kva hennar anbefaling var i saka, men det er på det reine at Statsadvokaten meiner politiet ikkje har nok bevis til at det er sannsynleg at den sikta blir domfelt.
Advokat Elisabeth Rød er kvinna sin bistandsadvokat.
— Min klient har ikkje tatt stilling til om ho vil klage på Statsadvokaten si avgjersle, seier ho.