Bildet frå Ørneneibba overfor Ølmedal i Imsland blei plukka ut som vinnarbildet i Grannar sin fotokonkurranse til årets Sommarmagasin. Det kom inn mange og svært gode bidrag frå lesarane, og det var fleire kandidatar som merka seg ut godt ut både teknisk og motivmessig. Dei innkome bilda viser at Etne og Vindafjord er rik på flotte stader og naturperler som er verdt å utforska.
Vinnarbildet er tatt av Bodil Imsland (47). Det oppfyller på ein god måte kriteria som konkurransen spurde etter; det unike i naturen vår, løftar fram eit mål for turfolket og har med person som gir bildet eit perspektiv. Her kjem også den flotte utsikta over gardar, bygd og fjord svært godt fram. Dei mange bidraga til fotokonkurransen viser at det er flust av flinke fotografar blant Grannar-lesarane som har sans for detaljar og gode komposisjonar, henta frå naturen i distriktet.
— Bildet er tatt på ein tur nå i vår, og det er sonen, Oskar Marvik på 14 år, som har stilt seg ute på nibba, opplyser fotografen, Bodil Imsland, lærar ved skulen i Imsland og busett på ein av gardane nedafor spissen av nibba.
Ho fortel at familien elskar å gå på tur, at ferda går ofte opp i Imslandsfjellet og at fotografering alltid er ein del av utflukta. Sjølv om ho er oppvaksen i Ølmedal, viste ho ikkje om naturskatten Ørnenibba før nyleg. Fatet, ei karakteristisk flyttblokk som ligg i same fjellområde, er bygda sin representant i årets fjellturopplegg i regi av Vindafjord kommune. For å koma til den spesielle nibba må ein ta av til venstre frå merka løype og fylgja fjelldraget sørover mot nuten Tinden.
Grannar vil takka alle som deltok i fotokonkurransen til årets sommarmagasin. Me presenterer bidraga som kom inn. Målet vårt har vore å få fram det flotte og spesielle i naturen i våre to kommunar, og inspirera turfolket til å finna fram til nye og spennande mål.
Ha ein god tursommar!
Arne Frøkedal
redaktør