Så har vatsbuen Håvard Nordtveit (26) endeleg fått sin debut i verdas største og mest prestisjetunge fotball-liga. Med nummer 4 på ryggen, var vindafjordingen i startoppstillinga til West Ham under måndagens Premier League, i derbyoppgjer mot Chelsea på Stamford Brigde.
Og det blei ein svært tøff sesongstart både for Nordtveit, og for det nye laget hans som imponerte stort i førre sesong. Heimelaget Chelsea, ein av favorittane til å ta Premier League-tittelen, var det klart beste laget og resultatet 2-1 var heilt fortent.
Vatsbuen hadde rolla som defensiv midtbanespelar, og mot tekniske gode og raske motstandarar, blei det ei vanskeleg oppgåve for Nordtveit og West Ham sitt forsvar.
Det stod 0-0 ved pause, men Chelsea tok leiinga tidleg etter sidebyte. West Ham utlikna i det 77. minutt, ti minuttar etter at Nordtveit var blitt bytta ut med den franske landslagsstjerna Dimitri Peyet. Gjestene kom betre med i kampen, men eitt minutt før full tid fekk heimelaget mål nummer to og ein draumestart på årets sesong i England.
Nordtveit greidde aldri å markera seg i kampen og treng truleg tid til å omstilla seg frå den tyske stilen til den meir tøffare britiske fotballen. Han fekk heller ikkje topp attest av TV2-ekspert Brede Hangeland. Den tidlegare Engeland-proffen meinte at nordmannen stort sett gjorde det enkelt og greitt, men at eit par stygge feilpasningar lett kunne ha straffa seg.
Debuten i London kom ni år etter at Håvard Nordtveit sensasjonelt blei selt til frå FK Haugesund til Arsenal. Ein gutedraum har blitt oppfylt.