Janine Grimaas og Gerhard Haakull er spente før avreise til saueklyppe-VM i Wales. Foto: Bjørn K. Kjellesvik

Bjørn K. Kjellesvik

Verdsmeisterskapet i saueklypping går ikkje berre ut å klippe sauer. Det er også ein konkurranse om kven som er best til å sortere ulla som ligg att etter all klippinga. Dette skal Janine Grimaas frå Vikedal, og Gerhard Haakull frå Skjold konkurrere i når dei reisar til den vesle staden Aberystwyth rett utanfor Cardiff i Wales. Grimaas, som ikkje har vore med i VM før, er veldig spent på korleis det skal gå. Haakull var med under VM i Australia i 2005, men at dette VM-et vert arrangert på dei britiske øyer gjer meisterskapet spesielt.

— Britane har ein spesiell måte å sortere og pakke ulla på, så det blir ein uvant og annleis konkurranse for oss, forklarar Haakull.
60 deltakarar frå 30 land
Dei to ullsorterarane reiser saman med to klypparar frå Bjerkreim, for å forsvara den norske æra i «the World Shearing Championship». Haakull påpeikar at på grunn av den uvante konkurransemåten så vil ambisjonane senkast eit lite hakk, men han understrekar at han har visse håp.

— Ein topp ti-plassering bør eg klara, stadfestar ullsamlaren.
Grimaas, som jobbar på ullstasjonen ved Nortura i Sandeid, er ikkje like konkret i målsettinga, og ho er litt usikker på kva ho går til.
— Det er vanskeleg å ha ei målsetting når eg ikkje er heilt sikker på korleis nivået er, poengterer ho.
Dei er Noregs to representantar i ullsorteringskonkurransen der det er to deltakarar frå kvart av dei 30 deltakande landa. Det vil seie at det er totalt 60 som gjer seg gjeldande i tevlinga.

Dei reisar bort nokre dagar før det heile startar, noko dei er særs nøgde med.
— Me får to treningsdagar der me får testa ut utstyret og den britiske måten å gjer det på, fortel Haakull.
Dei er usikre på om det vert noko feriering i mellom slaga i Wales, men ser ikkje vekk i frå at det kan bli litt pausar inni mellom der dei kan få sjansen til å sjå seg om på The Royal Welsh Show, som er ein stor marknad som i år også står for arrangeringa av klyppemeisterskapet.
— Det er eit massivt arrangement, fortel distriktets to håp i årets klyppe-VM.