Ølensbuen har investert i shippingindustri, eigedom og obligasjonar. Selskapet Ar Vekst AS og dotterselskapet Ar Obligasjon AS står med eit resultat før skatt på til saman 7,7 millionar kroner i 2009. Eigaren sjølv, Arne Risøy, har ikkje tatt ut ei krone i utbytte.

— For meg er dette ein hobby. Det er kjekt at det går godt, men plutseleg kan det snu, seier 46-åringen til Grannar.

Til vanleg er han tilsett i Tveit Regnskap AS, og tidlegare var han landbrukssjef i Vindafjord, men han har drive med investeringar på fritida i fleire år. Noko planar om å endra på dette har han slett ikkje.

— Det er noko med å ha ein fast jobb og eit sosialt liv, så eg har ingen planar om å driva med dette på fulltid, seier Risøy.

To selskap

— Eg har to investeringsselskap. Då det gjekk dårleg i finanskrisa, gjorde eg nokre gode kjøp. Det er grunnen til at selskapa går såpass bra nå, seier 46-åringen som har ein samla eigenkapital i dei to selskapa på vel 12 millionar kroner.

I finanskrisa var det vanskeleg for verksemder å få lån, fordi bankane strevde med å få tak i pengar. Det gjorde at fleire selskap måtte tenka alternativt når dei trengte kapital. 

— AR Obligasjon AS kjøpte obligasjonar i børsnoterte selskap som for eksempel Storebrand Liv, Haugesund Sparebank og SpareBank 1, og for dette fekk eg høg rente i dei dårlege tidene, seier Risøy.

Han ser lyst på framtida.

— 2010 ser også bra ut, men det er lett å bli for ivrig i medgang, seier han.

Aktiviteten i selskapet AR Obligasjon AS består av renteberande obligasjonar. Obligasjonane har ei varierande løpetid på 3-5 år.

— Grunnen til at eg har oppretta aksjeselskap er at eg vil sleppa å ha privat risiko. Dessutan er det noko meir gunstig i forhold til skatt, seier Risøy.

Ar Vekst AS

Fram til 2008 gjekk det stort sett greitt i shippingindustrien.

— Dette var eit dårleg år, og eg måtte gjera ein del avskrivingar i selskapet, fortel Risøy.

Då næringa fekk eit oppsving i andre halvdel av 2009, førte det også til gode resultat i Ar Vekst AS.

— Etter nedgang pleier det komma oppgang, seier ølensbuen.

Aktiviteten til Ar Vekst AS består av investeringar innan shipping og eigedom. Størsteparten av investeringane er KS-prosjekt innan shipping og eigedom som er utleigd på minst femårskontraktar. Selskapet har også børsnoterte aksjar og obligasjonar. I 2009 hadde selskapet  nærmare 23 millionar kroner i investeringar.

— Investeringa byrja i det små, og etterkvart utvikla dette seg i rett retning. Spesielt i finanskrisa opna det seg mange sjansar, seier Arne Risøy.

Han likar å vera passeleg offensiv, som han seier.

— Det gjeld å posisjonera seg for gode muligheiter, meiner 46-åringen.