Eldkule på himmelen

Det er ikkje ofte ein får sjå noko anna enn stjerner og stjerneskot ved sida av månen på himmelen etter at sola har gått ned. Ved midnatt tysdag i sist veke, fekk Jan Christian Kolstø og sambuar Tone Jørstad og foreldra hans oppleva eit uvanleg syn frå hytta i Isvik.
— Me sat på kaien og kosa oss etter VM-kampen då me plutseleg såg eldkula på den klare himmelen, seier Jan Christian Kolstø. Han fortel at eldkula kom til syne i søraust like over Nes i Skjold. Eldkula raste så nesten vassrett på skrå mot vest.
— Ho hadde ein hale av eld etter seg, og brennande bitar fall av undervegs, seier han.
Det paradoksale oppe i dette uvanlege synet, var at far til Jan Christian Kolstø, Jan Henrik Kolstø, som er lidenskapeleg interessert i astronomi, gjekk glipp av dei få sekunda eldkula var på himmelen. Berre nokre få minutt før eldkula viste seg, hadde han stått på kaien med stjernekikkerten og sett opp på himmelen.
— Viss det var nokon som skulle få sjå dette, var det i alle fall far min, som er lidenskapeleg interessert i astronomi. Dessverre sat han med ryggen til akkurat i dei sekunda det skjedde, seier Kolstø. Dagen etter synet kontakta Kolstø Norsk romfartssenter og fortalde om det han hadde sett.
— Dei var interesserte i observasjonen og skulle undersøke det nærare, men truleg har eldkula brunne opp i atmosfæren, og ikkje etterlete seg bitar på jorda.