Tradisjonen tru er det igjen duka for Ølmedalen Rundt 2. pinsedag. Det har allereie vore kjent ei stund at langrennsløparen Hilde Gjermundshaug Pedersen kjem med døtrene Ida og Eli. Nå har også Oddbjørn Hjelmeset stadfesta at han kjem. Fjorårets løp gav meirsmak.
— Han syntest det var kjempekjekt i fjor og sa han tykte det var artig i Vindafjord, seier Lars Olav Larsen, leiar i Vindafjord Idrettslag.
Familien i sentrum
Jamvel om profesjonelle utøvarar plar vera trekkplastra i Ølmedalen Rundt, er mosjonistane i stort fleirtal rundt vatnet.
— Me prøver å legga vekt på at familien skal vera i sentrum. Det er viktig for å få folk ut i naturen og trimma litt, seier Larsen, og meiner at det difor passar godt å få familien Gjermundshaug Pedersen som trekkplaster til løpet.
Ølmedalen Rundt blir i år arrangert for 19. gong. Larsen trur dei har funne ei ramme rundt løpet som fenger.
— Me legg vekt på trivsel og at det skal vera løye å vera ute i naturen, seier Larsen.
Deltakarrekorden er 1.300 og dei tre-fire siste åra har snittet lege over 1.000 deltakarar. Larsen er usikker på om det blir ny rekord i år, og seier han er audmjuk i forhold til det.
— Eg håper det blir bra med folk. Me veit aldri kor mange som kjem. Det blir eit tradisjonelt opplegg med masse folk, god mat og me satsar på brukbart vêr. I fjor var ca. 1.100 løparar med, og me er nøgde viss det kjem like mange som i fjor, seier Larsen.
Spennande
Løyperekorden har etnebuen Knut Erik Rame, som spring for Gjesdal, med tida 19.41. Larsen veit ikkje om Rame kjem i år. I fjor vann Urige Buta frå HIL, og dersom han kjem til Ølmedal i år, har Larsen tru på at sigeren igjen går til Haugesund.
I kvinneklassen sette Susanne Wigene rekord i fjor, men ho kjem ikkje i år. Miriam Berg Hovda har også markert seg, og Larsen trur i tillegg at mor og døtrer Gjermundshaug Pedersen kjem til å gjera det skarpt.
Vindafjord-ordførar Arne Bergsvåg skal kasta glans over premieutdelinga.
— Det blir ei positiv ramme rundt premieutdelinga ved at ordføraren er med, seier Larsen.