Flyttar inn hos Solskjær

Håvard Nordtveit har svært travle dagar og det lukkast ikkje Grannar å få tak i han. I staden vart det ein prat med pappa, Øyvind Nordtveit, om den spanande Englandsturen.
— Det er veldig mykje som skjer nå. Håvard bestemte seg for å reise til Manchester for to –tre veker sidan, det var eit naturleg val, sidan Manchester United er favorittklubben og kompisen hans, Magnus Ekreim, frå landslaget spelar i klubben, seier Øyvind Nordtveit.
FKH er også dialog med Tottenham, om eit treningsopphald for Håvard, og det er ikkje usannsynleg at det blir ein tur til London også.
Skal bu hos Solskjær
Det er ikkje hos kven som helst Håvard Nordtveit har fått losji hos under opphaldet. Han skal faktisk bu i kjellarleilegheiten til Ole Gunnar Solskjær.
— Magnus Ekreim bur der fast, og Håvard flyttar inn dei ni dagane han er der borte, fortel Øyvind Nordtveit.
Pappa Nordtveit og agent Jim Solbakken skal også vera med til England i november.
— Kva skjer dersom han får eit tilbod frå Manchester United?
— Mitt råd til Håvard blir at han må slå til. Eit slikt tilbod er det ikkje kvar dag ein får. Dette er noko som skjer ein gong i livet, og eg synest han bør satsa dersom ein slik moglegheit dukkar opp. I tilfelle det blir kontrakt, kjem me til å flytta over til England ein periode. Eg er ikkje redd for at han ikkje får nok oppfølging, men det er trygt å vera der. Dersom tilbodet kjem og han takkar nei, trur eg Håvard kjem til å angra. Men først er det ni dagar med prøvespeling, så får me sjå kva som skjer, seier ein spent pappa.
Landslaget i helga
Først ut på den travle timeplanen til Håvard, er landslagsspel. Laurdag reiser han til Estland for å spela 1. kvalifiserande EM –runde for G16 -landslaget.
I løpet av tre kampar skal Noreg møte Kroatia, Nederland og Estland.
— Det er viktig at Håvard klarar å halda fokus på dei rette tinga, og det trur eg han klarar fint. Det er landslagsspel, og serieinnspurt med FKH, før me kan retta nasa austover mot England, seier Øyvind Nordtveit.
— Er Manchester United favorittlaget ditt også?
— Nei! For meg er det berre Liverpool, og slik det kjem til å vera sjølv om Håvard får kontrakt i Manchester United. Heia Liverpool, seier han og ler.