Satsar ein million på unge

Å skaffe pengar til nye tiltak i Vindafjord, er som å gnage på knokane. Men ei prosjektgruppe som har vurdert framtida til ungdomsklubbane i kommunen, vil bruke ein million kroner over to år for å sjå om fritidsklubbar er liv laga.
Skjold og Ølen
Det skal blåsast liv i ungdomsklubbane Hipp i Skjold og Public i Ølen. Desse to er valt ut fordi Public ligg i kommunesenteret og Hipp har lang tradisjon som ungdomsklubb, pluss at ungdomsmiljøet i Skjold er nærmast Haugesund.
Høgrepolitikaren Tone Hatteland har arbeidd aktivt med ungdomsproblematikken i gamle Ølen kommune, og var blant støttespelarane då Public Ungdomshus kom i stand i den nedlagde barnehagen i Litlehagen i Ølen.
Ho ser problemet med å skaffe ein million kroner til prosjektet, men har håp at det vil ordne seg.
To år
— Det er ikkje uproblematisk, men eg håpar det kan gå ved å bruke av andre stillingar i kommunen. Det er difor ikkje berre snakk om friske pengar, seier Hatteland.
Det blir i dag brukt vel 162.000 kroner på ungdomsklubbane i Vindafjord. Og klubbar i andre delar av kommunen skal få tilskot som før, meiner prosjektgruppa.
— All erfaring tyder på at det ikkje duger å drive fridtidslubbane halvvegs. Det er tilbakemeldinga frå Tysvær som satsar skikkeleg på ein klubb. Vi tenkjer oss eit prøveprosjekt i Vindafjord i to år, og så får vi sjå om det var det rette, seier Hatteland.
Det viktigaste verkemiddelet i satsinga er å tilsette ein prosjektmedarbeidar.
Ungdomsmiljø
Ho meiner tida har sprunge frå at det er nok å opne eit hus og kjøpe inn eit biljardbord. I følgje Hatteland er det vanskeleg å få foreldre til å drive ungdomsklubb, og vaksen styring er heilt nødvendig, meiner ho.
— Ungdomsklubbar som fungerer er viktig for det førebyggjande arbeidet blant ungdom. Rus er blitt ei stor utfordring. Kommunen må vere med å ta ansvar for dei som fell utanfor andre tilbod, seier Hatteland.
Ho viser til at både politiet og MOT har understreka at fritidsklubbane har positiv betydning for ungdomsmiljøet.