Overtar heile Raunes

Jon Edvardsen

I 2004 fekk AF Decom ein avtale om å leige 18 dekar på industriområdet på Raunes til opphogging av oljeinstallasjonar for 30 år framover. No er heile området, 170 dekar, leigd ut til Decom gjennom ein tilleggsavtale.
Den årlege leigesummen blir dermed utvida frå vel 1,5 millionar kroner til vel 2,3 millionar som går inn i kommunekassa.

50 år
Inne denne prislappen er det gamle arealet på 18 dekar med kaier, pluss 62 dekar opparbeidd areal og 90 dekar som er fjell og knausar. Selskapet har rett til å framleige dette arealet til andre, og når opphogginga Decom har avtale om i dag er ferdig, i 2014, har selskapet rett til å forhandle om å trappe ned dette arealet dersom det skulle bli ein brå slutt på opphoggingseventyret.
Men om selskapet vil, kan det ha hand om alt arealet i 30 år, pluss opsjon i fire omgangar på fem år etter det, til saman 50 år frå 2004. Formannskapet i Vindafjord godkjende tilleggsavtalen denne veka.

Sikre areal
Selskapet har fylt ut i fjorden, utvida kaiar og sprengt ut betydelege areal i fjell. Dagleg leiar i det som er omdøypt til AF Miljøbase Vats, Arne Skogheim, seier selskapet ikkje har konkrete planar om å utvide på basen ut over det opparbeidde arealet på 80 dekar som er i dag.
Men i tillegg har Decom altså fått hand om 90 dekar å utvide på.
— Vi har i dag ingen konkrete planar om å utvide, og har heller ikkje søkt om det. Vi driv forretning og det er sjølvsagt ikkje for moro skuld vi leiger dette arealet. Vi vil sikre oss eit område å utvide på dersom det blir aktuelt, seier Skogheim.
AF Decom har inne ein søknad hos fylkesmannen om å utvide utsleppsløyvet for mengde med vatn som går gjennom anlegget fordi arealet er utvida. Den omhandlar ikkje grenseverdiane for forureining, og søknaden er ikkje ferdig hos fylkesmannen i Rogaland enno.
Søknaden om å forlenge løyvet for arbeidet med oljebøya Kittiwake» er godkjent av Statens forureiningstilsyn, men den skal vere klaga inn for Miljøverndepartementet.

SFT sette foten ned

Statens forureiningstilsyn sette foten ned og sa nei til AF Decom sine søknader om å dumpe spillvatn og mure inne ballastmasse frå Kittiwake».

Dei 721 kubikkmetrane med spillvatn med olje i frå Kittiwake» er alt levert til Stavanger Slop i Mekjarvik som tar imot forureina spillvatn. Spillvatnet i lastebøya inneheldt litt olje, og AF Decom ønskte å sleppe spillvatnet i sjøen når dei likevel skulle slepe lekteren til Karmøy. Det skulle vere eit langsamt og kontrollert utslepp, i følgje selskapet.
Men det sa SFT nei til og viser til krava selskapet har når det gjeld handtering av ballastvatn i godkjent anlegg.
AF Decom AS har sjølv ikkje anlegg i Vats til å ta seg av ballastvatn.

To avslag
Decom fekk også avslag hos SFT på søknaden om å mure 1.450 tonn barytt (ballastmasse) frå Kittiwake» inn i ei kai på Raunes. Barytt kan leke ut tungmetall. I følgje SFT er det ikkje uaktuelt å deponere ballastmåte på andre måtar enn gjennom avfallshandtering, men SFT meiner AF Decom ikkje hadde dokumentasjon god nok på at barytten var stabil nok til å deponere i ei kai.
— Vi rettar oss sjølvsagt etter SFT når dei meiner våre løysingar ikkje er gode nok, seier Arne Skogheim, dagleg leiar i AF Miljøbase Vats.
Miljø for andre
I svarbrevet har SFT det ein kan oppfatte som ein refs av selskapet på grunn av søknadene: SFT mener det er viktig at bedriften gjør det som er mulig for å etterleve allerede fastsatte krav. Det er i dette området mange andre næringsinteresser, herunder fiske- og havbruksinteresser, som er avhengige av forutsigbarhet og et godt miljø.»
Arne Skogheim meiner derimot at utsleppsløyvet dei har, ikkje er til hinder for at dei kan søkje om andre forsvarlege måtar å handtere avfall på.
— I eit miljørekneskap meiner vi det var den beste løysinga med eit kontrollert utslepp sidan det var snakk om tre liter olje i ei samla væske på 721 kubikk. Vi er pålagt å vere minst mogleg forureinande, men i dette tilfellet meiner SFT noko anna og det aksepterer vi, seier Skogheim.