Det har vore travle dagar for etnekunstnaren Jan Terje Rafdal. Sist søndag sette han, saman med fleire familiemedlemmer, kursen for USA og New York. Målet var ei utstilling på prestisjefulle Chelsea Art Museum på Manhatten.
Draum i oppfylling
I fjor sommar fortalde Jan Terje Rafdal til Grannar om den planlagde utstillinga i USA, og at det var den engelske kunstnarvenen, Jeremy Gardiner som fekk ideen til prosjektet. Etterkvart vart Rafdal sjølv engasjert, og dei to har jobba saman i over eitt år med tanke på å kome til New York. Sjølv om forventningane er store, veit han at det ikkje er lett å lukkast der borte.
Verdsarv
Kystlina Jurassic Coast er blitt ein del av verdsarven på UNESCO si verdsarvliste, og det er denne dei to kunstnarane har gjenskapt i utstillinga.
— Ein kan finne mange fossil i desse områda, og alle måleria er henta frå foto av ekte fossil, og dei er blitt til eit slags portrett av eit landskap, fortalde Rafdal.
På plass i verdsbyen
Utstillinga i Chelsea Art Museum viser eit dynamisk virtuelt landskap. Blant anna eit arbeid «Jurassic Coast Light Years» som han har arbeidd med saman med blant andre Jeremy Gardiner. Utsnitt av måleria og grafiske blad er bearbeidd i eit 3D-program.
— I går var det ein liten vernissage berre for vår utstilling. I dag, torsdag er det ein mykje større vernissage for heile museet der tre andre utstillingar er inkludert, blant anna den svært kjende Pol Bury, rapporterer Jan Terje Rafdal i ein e-post til Grannar.