Den forsvunne papegøyen

Mellom klokka eitt og halv to natt til fredag vart trepapegøyen Globi stele av ein forbipasserande bil på Børkjenes. Papegøyen stod med postkassen til Edna Trovanelli som bur på Børkjenes.
— Mannen min var tilfeldigvis vaken då det skjedde og sprang ut, men bilen rakk akkurat å køyre av stad, seier Trovanelli.
Ho fortel om ein stor varebil med to personar inni. Dei hadde stoppa 20 meter frå papegøyen, for så å rygge tilbake for å brekke den av og ta den med seg. Trafikken på Børkjenes aukar kraftig under Blues-festivalen, men Trovanelli forstår likevel ikkje kven som kjem på å stele ein papegøyestatue av tre.
— Eg skjønar ikkje kva dei skal med den, seier ho.
Ho vonar no at papegøyen vil koma til rettes igjen.