6.692 personar var heilt arbeidsledige i Hordaland ved utgangen av august, dette tilsvarer 2,6 prosent av arbeidsstyrken, ei nedgang på 0,1 prosent frå førre månad. Nedgongen i talet skuldast i følgje Nav at fleire deltok i arbeidsmarknadstiltak i august. 1.033 arbeidssøkjarar deltok i arbeidsmarknadstiltak denne månaden. Det er 300 fleire enn førre månad.
Færre blir også permitterte. Talet på permisjonar har gått jamnt nedover sidan toppen i april, då det var til saman 1.754 personar permitterte, mot 1.362 i august .
Månadstala frå Nav viser ein meir positiv tendens enn frykta, men at det likevel kan snu.
— Tala stadfestar at arbeidsløysa ikkje auka så sterkt som prognosane tidlegare i år tilsa. Men lågkonjunkturen er ikkje over enno. Me har fått signal frå industrien, særskilt i Sunnhordland, som tyder på at arbeidsløysa vil auka, seier fylkesdirektør i Nav Hordaland, Anne Kverneland Bogsnes.
Den høgste arbeidsløysa i fylket er i og rundt Bergen, medan kommunar i Nordhordland, Sunnhordland og Hardanger har lågast arbeidsløyse. I Etne kommune var det i august månad 25 personar arbeidsledige, desse utgjorde 1,2 prosent av arbeidsstyrken. Etne er blant Hordaland-kommunane med minst arbeidsløyse.
I Rogaland fylke var det i august månad færre permittering, og ei svært lita auke i arbeidsløysa. Det er nå 5.033 personar registrerte som heilt ledige i Rogaland, dei utgjer 2,2 prosent av arbeidsstyrken i fylket. Dette er ei auke på tretten personar frå juli månad, og særskilt er det folk under 30 år som nå melder seg som arbeidssøkjande.
Også i Rogaland er færre menneske permitterte i august månad. 550 er heilt permitterte, i nord-fylket er det størst nedgang i talet på permitteringar. Her er det 82 personar lågare enn førre månad.
I Vindafjord kommune er talet på arbeidsledige 43, noko som tilsvarar 1,0 prosent av arbeidsstyrken. Det er 11 fleire enn i fjor på same tid.
Vindafjord er også ein av rogalandskommunane med lågast arbeidsløyse.