Optimismen rår på Ølen senter. Coop Mega opnar i morgon sin Post i Butikk, og på fredag blir det igjen drift i senterkafeen. Men viktigast av alt er kanskje at Vindafjord får vinmonopol til neste år, og mykje tydar på at det blir plassert i senteret.
— Det betyr mykje for kundetilstrøyminga, for dei fleste som er innom og skal ha seg ei flaske vin, kjøper òg andre ting i same slengen, seier Mona Spildrejorde som er styrar i Mega-butikken til Ølen samyrkelag.
Med utvidinga til Post i Butikk styrkar Coop Mega sin posisjon som den største butikken på senteret, og det er òg den einaste Mega-butikken i distriktet.
Dei tilsette ved den nedlagte klesbutikken «Begge to» har gått over i andre funksjonar i staben ved Mega, og nå har Posten hatt opplæring for dei som skal ekspedera dei nye postgjestene.
— Den utvida opningstida fram til klokka 21 på kvardagar gjeld både post og butikk, og me trur at me kan tilby ei betre postteneste på denne måten, forklarar Spildrejorde.
Ølen samyrkelag har òg planar om ei utviding av senteret der det kan bli aktuelt å ta Byggmix-butikken inn i senteret saman med Mega.
— Dei konkrete planane er ennå ikkje heilt klare, men det er nærliggande at Byggmix i ei litt anna form enn i dag går saman med Mega, seier Arne Borgemyr, styreleiar i Ølen samyrkelag.
Borgemyr er svært glad for at senterkafeen opnar igjen på fredag, og prosjektleiar Egil Jørgensen i Catering Partner er ikkje redd for at det skal bli ei ny nedlegging av kafeen.
— Me kjem til å driva den på ein litt annan måte med eit cateringkjøkken i kafeen slik at kundar også kan komma og henta serveringsklar mat på kafeen. I tillegg kjem me til å dra nytte av den store kantina me har på Westcon, fortel Jørgensen.