Etter eitt år med førebuing, konfirmasjonsleir og mykje moro saman er tida komen for den store konfirmasjonsdagen. Dagen som fører dei unge over i dei vaksne sine rekkjer.
— Nå startar vaksenlivet, seier 14 år gamle Camilla Aune frå Etne og gjer seg klar til konfirmasjonsgudstenesta i Etne kyrkje denne vakre maidagen.
— Frå ungdomstid går me nå over til å bli vaksen, seier ho.
Læra om livet
Konfirmantførebuing består ikkje berre i å få bunaden klar i tide, eller gjestelista på plass. Det handlar om å læra om livet.
— Me har hatt konfirmasjonstimar der me har snakka om Gud og slikt. Og så har me samla inn pengar til Kirkens nødhjelp for å skaffa reint vatn til folk som treng det. Me har fått innblikk i korleis livet er for andre enn oss sjølve, seier Camilla Aune.
— Og så ha me vore på leir og møtt masse folk. Det har vore kjekt, skyt venninna Amalie Grindheim inn før presten kallar ungdommane inn til seremonien som skal ta dei over i dei vaksne sine rekkjer.
Familiefest
Og etterpå ventar den store familiefesten. Med god mat og ei triveleg stund saman med familie og vener.
— Eg gleder meg aller mest til å sjå heile familien. Det blir det kjekkaste i dag. Og til middag skal me ha thaimat. Det blir kjempegodt, seier Camilla med eit smil.