Terje Halleland frå Ølensvåg har fått tredjeplassen på Rogaland Frp si liste til stortingsvalet neste år. Med utgangspunkt i at partiet har tre stortingsrepresentantar frå Rogaland i dag, er han på såkalla sikker plass. Lista vart vedtatt på Rogaland Frp sitt nominasjonsmøte i dag.
Horne på topp
På toppen av stortingslista for 2017-2021 er Solveig Horne frå Sola som også er vald representant i dag, men sit i regjeringa som barne- og likestillingsminister. Andreplassen på lista går til Roy Steffensen frå Gjesdal som møter som fast vara i inneverande periode så lenge Horne er statsråd.
Halleland var tidlegare fylkesvaraordførar i Rogaland og han er i dag statssekretær i Landbruksdepartementet i eit vikariat fram til april.
Politikaren frå Vindafjord trekkjer fram samferdsel og nye arbeidsplassar som viktige saker framover.