Ølen tjuvstarta den tredje serierunden i 5. divisjon måndag kveld då dei møtte Vard 2 på bortebane.
Med 12-0 i målforskjell, seks poeng og tabelltopp etter dei første to kampane, gjekk turen måndag kveld til Haugesund for å møta Vard 2. Sjølv etter tapet mot Etne sist er nok Vard 2 den største favoritten til å vinne pulja i år.
Dette fekk verkeleg Ølen kjenna på i måndagens kamp. Stian Haugland sendte Ølen i føringa tidleg i kampen, men det skulle vise seg at det skulle snu så til dei grader.
Vard 2 snudde til 2-1 før pause, og sette inn fem mål til i andre omgang, 7-1 til Vard 2, og Ølen vert ståande med sine seks poeng.
Vard 2 kom seg dermed foran Ølen med eitt plussmål meir, og leiar førebels serien før dei andre laga skal i aksjon seinare i veka.
Etne spelar heime mot Nord på fredag, medan Vats 94/Skjoldar tek imot Rubbestadnes same kveld.