— Det største du kan vera med på
Sommaren 2019 kjem til å stå sterkt i minne til Oda Kambo Hersvik (16) og Mathilde Gravelsæter (17), for då drog dei to speidarane til West-Virginia for å delta på ei av verdas største ungdomsleirar.
Med tre fingrar heva til hovudet, kjende Mathilde Gravelsæter og Oda Kambo Hersvik verkeleg på det internasjonale fellesskapet som veslefingeren og tommelen representerer i speidarhelsinga då dei avla speidarløftet saman med 45.000 speidarar frå heile verda under årets verdsspeidarleir i West-Virginia, USA.
Opningsseremonien til årets World Scout Jamboree kan nærast samanliknast med OL-tilstandar, der kvart land kjem vandrande i tog med sitt flagg inn mot ei svær scene. Ingen ringare enn Bear Grylls (Edward Michael Grylls), eventyrar og programleiar i Mann mot Natur, var blant dei som tok imot dei mange tusen speidarane frå 180 land.
— Det er det største du kan vera med på i speidarorganisasjonen, seier Oda og smilar stort.
