Full fart og sprudlande idrettsglede
Innsatsen mangla ikkje verken under løpskonkurransen, lengdehoppet eller kulestøytingtevlinga då små og store samla seg til friidrettsstemne på Skånevik stadion.
Klokka tikkar sakte mot middagstid laurdag føremiddag og dei siste førebuingane til idrettsstemnet på idrettsbanen i Skånevik er i ferd med å koma på plass. Høgtalarutstyret er testa og godkjent, og deltakarlistene ligg klar på bordet. Startskotet til dagens første 60 meter er sett til klokka eitt, men med ei stadig vaksande kø i innsjekkingsområdet må dei løpsklare barna i første pulje smørja seg med litt ekstra tolmod før dei kan setja av garde. Etter ein litt forseinka start kan endeleg initiativtakar og leiar i IF Klypetussen, Gisle Sellevold, gripa mikrofonen og erklæra stemnet for ope.
— Nå trur eg klokka er akkurat passe, så nå går løpet for dei minste, seier Sellevold og finn fram stoppeklokka.
Saman med tre gode medhjelparar skal han ta seg av tidtakinga, og så snart tidtakargjengen har diskutert seg ferdig og funne sine rette plasseringar bak målstreken kan startskotet gå.
