Fekk gode treningstips
Damelaget og J16 handball i Ølen IL fekk mange nyttige treningstips då tidlegare landslagsspelar Christian Spanne frå Haugesund stakk innom for å trena saman med dei lokale spelarane.
Handballen står sterkt i Ølen IL, og heilt sidan idrettshallen i Ølen stod ferdig på 1980-talet har jenter og gutar trena handball innomhus på fritida. I dag er det jentene som dominerer på banen, og med lag i klassar heilt frå 5-årsalderen er det full aktivitet på kveldstid heile veka, i tillegg til skuleelevar som nyttar huset til trening på dagtid.
I slutten av september fekk idrettshallen nytt golv, og denne veka kunne damelaget og J16-laget samlast til trening på det nye sportsgolvet saman med tidlegare landslagsspelar i handball, Christian Spanne. 33-åringen frå Haugesund hadde tatt turen til Ølen i lag med sin far og leiar i firmaet som leverte sportsgolvet, for å takka for jobben og dela sine treningstips på det nye golvet.
— Det var veldig lærerikt og gav oss god inspirasjon. Me fekk masse tips og input til treningsopplegg, og fekk inn både kondis og teknikk samstundes, seier lagleiar og handballspelar på damelaget, Helene Haukland og synes det var stas å få besøk av handballspelaren som tidlegare har spelt for Haugaland, Stord, Drammen, polske Wisla Plock og det norske landslaget.
