Klare meiningar frå unge vatsbuar
Lovise Skrunes og Per Gjerde er to av sjuandeklassingane ved Vats skule, som har hatt lesarinnlegg på timeplanen dei to siste månadane. Å læra seg å argumentera for ei sak, har vore spennande, seier dei.
Å læra seg å skriva lesarinnlegg har vore tema for dei 17 sjuandeklassingane ved Vats skule dei siste par månadane. Og det har vore spennande å læra seg korleis ein skal skriva eit godt lesarinnlegg, er meldinga frå 12-åringane.
— Når me skal skriva lesarinnlegg er det viktig å få fram ulike element, og folk som les innlegget ditt må forstå kva du vil fram til. Det er også viktig å skriva litt om korleis du har tenkt å løysa problemet, seier Sofie Ihle engasjert.
Ho er ikkje åleine om å vera engasjert, for i klasserommet denne føremiddagen sprett hendene i vêret når dei får spørsmål om prosjektet dei har hatt.
