Sender stadig fleire pakkar
Julemånaden er den travlaste tida på året for alle som jobbar med pakkedistribusjon. Ved distribusjonssentral i Sandeid har dagleg leiar Lars Ove Vestbø og resten av staben huset fullt av julepost og pakkar som skal ut til mottakar før jul.
I desember månad handterer Posten i Noreg rundt éin million postpakkar i veka, i tillegg til alle småpakkar som får plass i postkassen til kundar over heile landet. Tilsette jobbar på spreng for å få pakkar og julepost trygt levert før jul, og ved sentralen i Sandeid har dei rikeleg å hengja fingrane i før julefreden kan seinka seg.
— Det er travelt før jul, og postboda gjer ein kjempejobb, konstaterer distribusjonsleiar Lars Ove Vestbø som styrer postflyten i distriktet frå sentralen på Steinsland Næringspark i Sandeid.
Sjølv om brevposten har hatt ein formidabel tilbakegang dei siste åra, har trykket på postpakkar auka jamt og trutt heile året.
