Testar nye teknikkar og motiv
Bladmetall og tekst i bilde er nye teknikkar Elin Arianson (60) frå Bjoa har testa ut dei siste åra. Nå er ho klar med si femte utstilling heime i båtbyggjarverkstaden der ho stiller ut 29 fargerike og spanande bilde.
I 2007 hadde Elin Arianson si første separatutstilling av eigne verk. Den gongen heldt ho til på kaien på Innbjoa, men dei siste åra har ho nytta båtbyggjarverkstaden til ektemannen heime på Utbjoa til galleri. Laurdag opnar ho si femte salsutstilling i sjøkanten og inviterer kunstinteresserte innom for å nyta dei mange fargerike bileta som har fått plass langs veggene i verkstaden. Nytt av året er eksotiske motiv malt i akrylmaling med bladmetall integrert i bildet.
— Bladmetall er noko eg har eksperimentert med dei siste to åra. Eg legg bladmetallet inn i bildet som er målt i akrylmåling, og det er veldig mange prosessar før ein kjem i mål. Eg har alltid nytta mest med oljemåling, men teknikkane eg brukar nå eignar seg best i akryl, seier Elin Arianson som i år også presenterer motiv der sjølvlaga tekst har fått plass inne i bildet.
— Eg har aldri laga tekst til bilde før. Først målar eg motivet før eg skriv inn tekst og målar på ny. Dermed ligg teksten og jobbar bak i bildet, seier 60-åringen som gjentek prosessen til ho er nøgd med resultatet.
