Statsminister Erna Solberg (H) seier nordmenn framleis må innstille seg på å leve med avgrensingar ei god stund sjølv om vaksinasjonen er godt i gang.
Solberg seier det er lys i tunnelen, men det er ei god stund til vi kan slappe av.
— Derfor har eg ein viktig bodskap til det norske folket i dag: Vi må halde fram med å ta ansvar saman, seier statsministeren.
Nordmenn må ta ansvar for sjølv ikkje å bli smitta, ikkje smitte andre og avgrense fysisk sosial kontakt.
— Men vi må òg ta ansvar for kvarandre. Mange strevar no, og ein del har gjort det lenge, seier Solberg. Ho oppmodar folk til å ta ein telefon, gå ein tur, og høyre korleis det går med folk som treng det.
Vaksinering
Helse- og omsorgsministeren Bent Høie (H) trur rundt 70 prosent av alle vaksne i Noreg kan vaksinerast innan juni.
— Viss alt går som vi håpar, trur vi at vi kan tilby vaksine til alle over 18 år til sommaren. Vi trur det vil innebere at rundt 70 prosent av alle vaksne vil ha takka ja til vaksine. I beste fall vil dette kunne skje i juni, sa helse- og omsorgsministeren i ei forklaring til Stortinget måndag.
Studentar
Statsminister Erna Solberg seier regjeringa vil komme tilbake med nye økonomiske tiltak for studentar som har tapt inntekt.
Det varsla statsministeren då ho orienterte Stortinget om koronahandteringa til regjeringa måndag.
— Regjeringa ser at det er behov for nye økonomiske tiltak for studentar som har tapt inntekt. Vi vil komme tilbake til omfanget og innretninga på dette, men vi ser framleis på Lånekassen som best eigna til å støtte studentane, sa Solberg.
Frp foreslo førre veke å løyve 1 milliard kroner for å hjelpe studentar, fortrinnsvis dei som har tapt inntekt under pandemien. Også dei raudgrøne partia krev auka støtte til studentane, og dette er eitt av temaa som blir diskuterte i samtalane mellom opposisjonspartia på Stortinget om forsterka krisepakketiltak.
Differensierte tiltak
Regjeringa tilrår at universitet, høgskular og fagskular held fram med digital undervisning, men opnar for fysisk undervisning i område med låg smitte.
I ei pressemelding måndag opplyser regjeringa at dei tilrår at universitet, høgskular og fagskular held fram med digital undervisning der det er mogleg, men at studentar i område med låg smitte bør få moglegheit til fysisk undervisning i mindre grupper minst éin gong i veka.
– No tyder tala på at smitten flatar ut og då prioriterer vi å opne litt opp for fysisk undervisning for studentane. Føresetnaden for tilrådinga er at det skjer i mindre grupper og at smittevernreglane blir følgde, seier forskings – og høgare utdanningsminister Henrik Asheim (H).
Universitet, høgskular og fagskular bør framleis unngå å gjennomføre større forelesingar.
Det er studiestadene, saman med lokale helsestyresmakter, som skal vurdere kva og kor mange studentar som kan få fysisk undervisning. Institusjonane må òg sørgje for å leggje til rette for dei studentane som har behov for det.
– Vi må nok halde ut litt til før det blir heilt som normalt, men no kan i alle fall endå litt fleire vende tilbake til campus, seier Asheim.
Sidan smittesituasjonen framleis er uviss, er det førebels ikkje mogleg for Folkehelseinstituttet og Helsedirektoratet å vurdere om tiltaka som vart innførte 4. januar har hatt tilstrekkeleg effekt.
Derfor kan det bli nødvendig med innstrammingar igjen viss smittetala går i negativ retning.
Forbodet mot skjenking av alkohol blir vidareført. Regjeringa vil gjere ei ny vurdering av forbodet neste veke.
— I lys av den uoversiktlege smittesituasjonen har vi valt å forlengje dette tiltaket, sa statsminister Erna Solberg (H) i forklaringa si for Stortinget måndag.
Det nasjonale skjenkeforbodet vart innført 4. januar.
Tidlegare måndag vart det kjent at Folkehelseinstituttet har tilrådd regjeringa å oppheve forbodet, og heller ha skjenkestopp ved midnatt og innsleppstopp på utestadene klokka 22.
Helsedirektoratet har på si side tilrådd regjeringa å halde oppe skjenkeforbodet.
— Vi veit at tilsette i serveringsbransjen er sterkt overrepresenterte når det gjeld koronasmitte. Og i ein rapport frå ei dansk ekspertgruppe som nyleg vart lagt fram, blir det vurdert at barar er blant dei stadene som har høgast verknad på smittespreiinga, sa Solberg.
Ho seier at regjeringa vil gjere ei ny vurdering neste veke av skjenkeforbodet.
Tiltaka blir senka frå raudt til gult nivå for ungdomsskular og vidaregåande skular frå onsdag, opplyser statsminister Erna Solberg (H).
Kommunar med høgt smittepress bør likevel vurdere å behalde raudt nivå i ungdomsskular og vidaregåande skular, og ved behov gå til raudt nivå òg i barnehagar og barneskular, sa Solberg då ho orienterte Stortinget måndag.
Regjeringa vil lette noko på fleire av tiltaka som vart innførte etter nyttår.
— Målet er særleg å gjere kvardagen for barn og unge litt meir normal, sa Solberg.
Kommunane kan halde oppe raudt nivå denne veka dersom dei har behov for å førebu overgang til gult nivå eller for å vurdere om dei framleis skal liggje på raudt nivå. Den lokale avgjerda er det smittevernstyresmaktene i kommunen som tek.
Opnar for fritidsaktivitetar ute
Barn og unge under 20 kan trene og delta i fritidsaktivitetar som normalt, både ute og inne, seier statsminister Erna Solberg (H).
— Dei kan òg sjå bort frå tilrådinga om 1 meters avstand når det er nødvendig i utøvinga av aktivitet, sa Solberg då ho gjorde greie for om koronahandteringa for Stortinget måndag.
Ordinær treningsaktivitet internt i lag, klubbar og foreiningar kan derfor gjennomførast.
— Men kampar, cupar og stemne, også for barn og unge må framleis utsetjast. For vaksne blir tilrådinga vidareført om ikkje å drive organisert aktivitet innandørs. Utandørs kan det trenast, dersom det er mogleg å halde god avstand, sa Solberg vidare.
Toppidretten blir tilrådd å utsetje alt seriespel i to veker.
Inntil fem gjester
Regjeringa fjernar rådet om å unngå å ta imot gjester heime, men tilrår framleis at folk avgrensar sosial kontakt.
— Vi tilrår at alle i størst mogleg grad framleis avgrensar sosial kontakt. Det blir oppmoda til å møte andre utandørs, og ikkje ha besøk av fleire enn 5 gjestar i tillegg til husstandsmedlemmer, sa statsminister Erna Solberg (H) då ho måndag orienterte i Stortinget om koronatiltaka.
Statsministeren understreka at dersom alle gjestene kjem frå same husstand, kan ein vere fleire. Men ein må likevel ikkje vere fleire enn at ein kan halde avstand.
