Regjeringa vil hindre torvuttak i nye område

– Myrene er store karbonlager. Uttak og bruk av torv gir utslepp av klimagassar. Torvuttaka skjer dessutan ofte i ei type myr som er ein trua naturtype i Noreg. Difor er det så viktig å verne torvmyrene våre, seier klima- og miljøminister Sveinung Rotevatn (V) i ei pressemelding frå regjeringa.

I klimaplanen varsla regjeringa at dei vil vurdere å innføre forbod mot å opne nye torvuttak. Regjeringa har òg starta utgreiing av ei avgift på utslepp av klimagassar frå uttak av torv. Fram til eit forbod mot slike uttak er avklart, ynskjer dei å hindre at det blir gitt løyve til nye torvuttak.