Dei siste sju dagane er det i snitt registrert 173 koronasmitta per dag. Tilsvarande snitt for sju dagar sidan låg på 278, så trenden er fallande.
Ved midnatt natt til tysdag var det utført 5,8 millionar koronatestar her i landet sidan februar i fjor.
I alt har 128.277 personar testa positivt.
Til no har 1.958.560 personar fått første dose av koronavaksinen, og 1.350.000 personar har fått andre dose.
Måndag var 47 koronapasientar innlagde på sjukehus. Det er like mange som fredag.
Til saman er 789 koronasmitta personar døde i Noreg sidan mars 2020, viser førebelse tal. Om pasientane har døydd av eller med covid-19, er ikkje alltid mogleg å slå fast.
58,3 prosent av alle døde har fylt 80 år. I aldersgruppa under 50 år er det meldt om 17 dødsfall i Noreg.
Oslo
Det er registrert 27 nye koronasmitta i Oslo siste døgn, ifølgje talet til kommunen. Det er 15 fleire enn dagen før, men 43 færre enn same dag førre veke.
867 Oslo-borgarar har testa positivt på covid-19 dei siste 14 dagane, noko som utgjer eit snitt på nær 62 smitta i døgnet, viser oversikta til kommunen.
Bydelen med høgast smittetrykk er framleis Vestre Aker, med 301,1 smitta per 100.000 innbyggjarar dei siste to vekene.
Stovner, som tidlegare lenge har toppa lista, er for tida den bydelen med lågast smittetrykk. Der er det berre 42 smitta per 100.000 innbyggjarar.
Generelt er det lågast smittetrykk i dei austlege delane av Oslo, medan dei vestlege bydelane har høgast smittetrykk.
Tidlegare har smitten vore fordelt nesten heilt likt på kjønn, men den siste tida har det gått mot ei overvekt av menn. Dei siste to vekene er 464 av dei 867 smitta menn.