Laksestrid forseinkar sal av prestegard
Usemje kring fiskerettar i Etneelva har forseinka prosessen med å leggje prestegarden i Etne ut for sal. Sokneprest Per Hjemdal, som har forkjøpsrett til eigedomen, fortvilar.
Sokneprest Per Hjemdal og kona Mali ønskjer å kjøpe prestegarden dei har leigd sidan familien kom til Etne for 11 år sidan. Men ein strid om fiskerettar tilhøyrande prestegarden har fram til no forseinka prosessen som gardeigaren, Opplysningsvesenets fond (Ovf), har sett i verk for å få til eit sal. Ovf, som eig ei lang rekke prestegarder, inkludert Etne, ønskjer å selje den delen av prestegarden som består av bustadhus og tilhøyrande bygningar. Dette som ein konsekvens av at ordninga med buplikt for prestar vart opphava av Stortinget i 2015.
Vil halde på fiskerettar
Men Ovf ønskjer å halde på eigarskapen til fiskerettane i sone 2, 3 og 10 som årleg bidreg med om lag 150.000 kroner i inntekter til Ovf. Det er desse rettane som i lang tid har vore leigd ut til Etne jeger og fisk, som igjen leiger rettane ut til sine medlemmer og ålmenta elles. Ei ordning begge partar ønskjer å halde fram med.
