Blant dei mange som er rekruttert
Dagleg leiar Svein Tore Haraldseid og produkt- og teknologiansvarleg Jan Christian Brattaas jobbar begge i Omega 365 Solutions og er stadig på jakt etter nye rekruttar. Målet er 200 nye tilsette på fire år, og i fjor var Tor Helleland ein av 50.
Tor Helleland (27) frå Ølen har det siste året hatt fast plass i kontorlandskapet hos Omega i Ølensvåg. I januar i fjor kom han nyutdanna frå universitetet i Bergen, og med seg i bagasjen hadde han bachelorgrad i datavitskap og mastergrad i bioinformatikk. Bioinformatikk handlar om dataanalysar av biologisk data, eksempelvis DNA-data, men først og fremst er det informatikk.
Som ny i stillinga som systemutviklar og programmerar i Omega, erfarte han ei bratt læringskurve, då programutviklar ikkje er direkte i tråd med bioinformatikk.
— Det har vore eit veldig spennande og kjekt år, der eg har fått lært mykje ny og relevant teknologi. Det byr også på mange moglegheiter. Er ein IT-utdanna må ein som regel setja seg inn i nye ting, der det er mykje å setja seg inn i, i starten, seier 27-åringen.
