Matvareprisane kan stige med 4–5 prosent på grunn av krigen i Ukraina. Landet er blant verdas største produsentar av korn, men norske brød og kornprodukt består i hovudsak av norsk korn, ifølgje Felleskjøpet.
Illustrasjonsfoto: Terje Bendiksby / NTB / NPK
Rapport: Matvareprisane kan stige med 5 prosent
Det tekniske berekningsutvalet (TBU) ventar at prisveksten på matvarer blir om lag 3 prosentpoeng høgare enn berekninga frå utvalet i februar.
Måndag offentleggjorde TBU dei endelege berekningane for lønns- og prisvekst i 2022, og matvareprisen vil bidra til aukande inflasjon, skriv E24.
TBU peikar på at internasjonale kveiteprisar i slutten av februar og starten av mars har skote i vêret frå eit allereie høgt nivå på grunn av krigen i Ukraina.
– På usikkert grunnlag er det anslått at norske matvareprisar, slik dei blir målte i konsumprisindeksen, vil stige mellom 4 og 5 prosent i 2022. skriv TBU i rapporten. Det er om lag 3 prosentpoeng høgare enn det som låg til grunn for prisanslaget i den førebelse rapporten dei la fram i februar.
