Manglar vikarar i omsorgssektoren
Rekrutteringa av helsepersonell er generelt utfordrande både i Etne og i Vindafjord. Jakta på sommarvikarar er i år meir utfordrande enn nokon gong tidlegare, og pandemien får litt av skulda.
Det er ikkje mange vekene igjen før dei første puljane med helsepersonell på omsorgssentera i Etne og Vindafjord kommunar går ut i ferie. Knut Lillemo (92) frå Vikedalsdalen er godt fornøgd, og kjenner allereie godt til Ingrid Engel Lindøe Egeland (20) frå Ølen, som er i gang med sommarjobben ho skal ha. Då ho i fjor sommar kledde seg i arbeidskleda for første gong, hadde ho inga erfaring i omsorgsyrket. Med god opplæring har det gått fint, og 20-åringen oppmodar fleire til å hiva seg med.
Rekrutteringa i år har derimot vore markant dårlegare enn før, og det gir utfordringar når kabalen skal løysast.
Både einingsleiar i Etne, Doreen Halleland, og einingsleiar i Vindafjord Annelin Bauge, har litt igjen før dei er i mål.
