Denne veka skjerpar politiet ruskontrollane

Desember er høgtid for juleselskap, fest og moro. Vinmonopol-salet skyt i vêret, og talet på juleselskap er mange. Det aukar risikoen for dagen derpå-promille, og trafikkulykker.

Så langt i år har 10.643 førarar vorte melde av politiet for ruspåverka køyring. Det er ein auke på 19 prosent frå same periode i 2021 (8916 meldingar), og ein nedgang på 3 prosent frå 2022 (10.963 meldingar).

Måndag 11. desember starta aksjonsveka der politiet har ekstra merksemd på ruskøyring i trafikken.

– Politiet førebyggjer og avdekkjer ruspåverka køyring kvar dag. Ein ruspåverka sjåfør har ingenting i trafikken å gjere og vi oppmodar alle trafikantar til å bidra til trafikktryggleik ved å køyre rusfri, seier UP-sjef Knut Smedsrud.

– Ein ruspåverka sjåfør utset ikkje berre seg sjølv, men også andre trafikantar for fare. I 22 prosent av dødsulykkene er ruspåverknad ei medverkande årsak til ulykka.