Yrke og utdanning
Marius (19) er lærling i gjenvinning
Eigentleg ville han bli sveisar, men reint tilfeldig enda han opp som lærling i gjenvinningsfaget ved Toraneset Miljøpark. Det viste seg å vera midt i blinken for 19 år gamle Marius Mala.
Etter to år på vidaregåande skule med VG 1 teknologi-og industrifag og VG2 industriteknologi på studieplanen kunne Marius Mala frå Odda ta fatt på to års læretid ved Haugaland Interkommunale Miljøverk (HIM) i fagområdet gjenvinningsfag.
Til hausten er han klar for å fagprøven, og når den er bestått har han ei mengd ulike yrkesvegar å velja mellom. Gjenvinningsfaget gir opplæring i fagområde som kundebehandling, avfallssortering, gjenbruk, drift av deponi, farleg avfall, kompostering, vedlikehald av utstyr og mottakskontroll på miljøstasjonar. I tillegg får lærlingane opplæring i bruk av ulike typar maskiner, og kan sikra seg sertifikat i mellom anna bruk av lift, truck, hjullastar og gravemaskin.
— Eg er glad for å vera her. Dette faget vil eg anbefala til andre. Her får eg mykje kompetanse og når er eg ferdig har eg mange moglegheiter, seier Marius Mala og stortrivst som lærling ved HIM sin miljøstasjon på Toraneset.
