Jussprofessor trur flytting truleg er innanfor regelverket

Torsdag kunne Grannar avsløre at administrasjonen til Haugaland interkommunale miljøverk IKS (HIM) har flytta frå kontorene sine på Toraneset i Skjold, til det nye driftsbygget på Årabrot i Haugesund.

Sjølv om administrasjonen har flytta er selskapet sitt formelle hovudkontor og postadresse framleis på Toraneset.

Må definere sjølv

Eivind Smith har vore professor i rettsvitskap ved UIO med særleg plikt til å førelese i offentleg rett sidan 1986. Nå er han pensjonist, men framleis knytt til UIO. Han seier at det er lov å flytte administrasjonen vekk frå hovudkontoret, også i interkommunale selskap.

— Selskapet sine organ må bestemme kva som skal vere dei formelle krava til eit hovudkontor, Smith.

Paragraf 4 i vedtektene frå då HIM blei etablert av eigarkommunane Bokn, Etne, Haugesund, Tysvær og Vindafjord i 2007 omhandlar hovudkontor. Der står det:

Selskapet har sitt hovudkontor ved stiftinga og inntil vidare i Vindafjord kommune.»

Det står ikkje noko om kva hovudkontoret skal bestå av i praksis.

Avheng av vedtektene

Administrerande direktør Gro Staveland og styreleiar Olav Linga meiner det var tydleg at administrasjonen skulle flytte då bygginga i Haugesund blei vedteke. Ordførar Ole Johan Vierdal (Sp) og varaordførar Gustav Løge Fosse (KrF), som sit i representantskapet, oppfatta ikkje flyttinga av administrasjonen som ein del av prosessen med vedtaket av det nye bygget. Det gjorde heller ikkje representantskapsleiar og Etne-ordførar Mette Heidi Bergsvåg Ekrheim.

Smith fortel at ei flytting av administrasjonen normalt sett ikkje krev eit vedtak i representantskap, men at det kjem ann på selskapet sine vedtekter.

— Det nye bygget er vel dimensjonert for å ha hovudkontoret. Det er eit spørsmål om kven som har visst kva og kven som har bestemt kva, seier professoren.

Det stod i årsmeldinga for 2022 at administrasjonen skulle flytte til Årabrot i 2023. Smith seier at årsmeldinga berre er ein forteljing og ikkje har nokon bindande kraft, sjølv om den gjer det vanskelegare å komme med kritikk mot informasjonen i forkant av flyttinga.

Han fortel at Vindafjord kommune ikkje har noko moglegheit til å få administrasjon tilbake til kommunen ved å vise til lovverk, og at det berre kan gjerast gjennom selskapsinterne forhold som han ikkje kjenner i detalj.