Fekk tilfeldigvis NM til bygda
Det var heilt tilfeldig at Etne blei tildelt NM i saueklipp og ullsortering komande september. Takka vera Vidar Aastvedt og Arnfinn Hustoft kan dei nå sjå fram til ei helg med tusen sauer og rundt 50 deltakarar.
Vidar Aastvedt (63) har travle dagar. Ikkje berre er han travel gardbrukar som er midt i lemminga, men han er også leiar for Etne Sau og Geit og til hausten står han i bresjen for å arrangera NM i Etne. Då kan ein trygt seie det brakar laus i bygda, for samtidig som NM går av stabelen 27. og 28. september blir Bondens marknad også arrangert utanfor Etne senter.
— Det blir ei super helg med NM og marknad på laurdagen, og på søndagen blir det kåring av årets vêrlam. Det har før vore gjort i samband med marknadsdagen, men me har ikkje kapasitet til å få samkøyrt dette på same dag i år. Men det blir ei skikkeleg saue-helg med alt som høyrer med. Laurdagsgrauten for eksempel, den blir bytta ut med fårikål, så det er berre å gle seg, seier Aastvedt.
På sparket
