Noverande assistent-trenar i IFK Gøteborg Sindre Tjelmeland (t.v.) i aksjon for Etne mot erkerival Ølen i 2017.
FOTO: MAGNE SKÅLNES
Noverande assistent-trenar i IFK Gøteborg Sindre Tjelmeland (t.v.) i aksjon for Etne mot erkerival Ølen i 2017. FOTO: MAGNE SKÅLNES

Årets høgdepunkt?

KOMMENTAR: For fotballinteresserte i Etne og Vindafjord har det vore mykje å vere stolt av dei siste åra. Vatsbuen Håvard Nordtveit bana veg for alle ved å vise at du kan kome frå ei lita grend i Vindafjord, bli plukka opp av Skjold IL, så FK Haugesund, deretter Arsenal – og resten er eit fotballeventyr som er få forunnt. Nordtveit har lagt fotballskoa på hylla, men er framleis ein god rollemodell for lokale håpefulle. Tidlegare lagkamerat og Nordtveit-kompis Kristoffer Haraldseid likeså, som fekk ei lang rekke eliteseriekampar for FKH og Molde før ein lei skade øydela planane for vidare satsing.

Kvinnefotballen er også på veg opp og fram. Her har 18-årige Kristine Hustveit Nybru frå Vikedal vist veg, først ved å etablere seg som toppseriespelar på Avaldsnes, og no som ei viktig brikke i nysatsinga i FK Haugesund. På same lag markerer Solfrid Hetleflåt Bråthen frå Etne seg med stadige skåringar for klubben som har opprykk til toppserien som mål. Også liker vi å gjere Vålerenga-proff og landslagsprofil Karina Sævik til «vår». Ho er jo tross alt sambuar i Etne, og mora er kommunalsjef i Etne kommune.

Torstein Tysvær Nymoen er ansvarleg redaktør i Grannar. FOTO: RINA ASPMO

Men kva er stoda for seniorlaga her inne? På kvinnesida er det Skjoldar som har «dominert» med sitt lag i 4. divisjon dei siste åra, men som har vore i tvil om dei ville ta eit opprykk om dei fekk mogelegheita. I år har dei fått ein sportsleg konkurrent i samarbeidslaget Etne/Ølen. Men ingen av dei er så langt nær noko opprykk.

På herresida er det ikkje noko betre. Etne IL var rett nok nær ved å rykke opp til 4. divisjon for nokre år sidan. Men i dag er dei tabelljumbo i 5. divisjon. I kveld ventar «årets høgdepunkt» for mange. Lokaloppgjeret Etne-Ølen. Det er altså høgdepunktet. Ein jumbofinale i 5. divisjon. Hallo. Det får då vere måte på kor beskjedne fotballherrane i Grannar-distriktet skal vere.

Det er på høg tid at fotballleiinga i lokale idrettslag set seg ned og tenker litt visjonært, ikkje minst for å gi ungdommen dei elles jobbar hardt for å gi eit tilbod også skal få noko lokalt å strekke seg etter. Her må det truleg eit samarbeid på tvers av kommunegrenser og grender til, for å i det minste skape eit stabilt A-lag i 4. divisjon. Det bør vere overkommeleg sjølv om mange spelarar reiser vekk for å studere og jobbe. Men med ein god og berekraftig sportsleg plan, helst både for menn og kvinner, bør det også vere mogeleg å få nokre av distriktets rike onklar med på laget til å fikse økonomien i eit slikt attraktivitetsprosjekt.

Torstein Tysvær Nymoen

Ansvarleg redaktør

debatt@grannar.no

Har du ei mening om denne saka? Send ditt debattinlegg til debatt@grannar.no

Les meir debatt her.