Små majestetar i barnehagen

Når personalet fortalde barna at kongeparet skulle koma til Vindafjord den 30. mai, sette det ideane i sving hjå dei små i Bjoa barnehage. Dei ville mellom anna laga slott, og neste veke skal barnehagen ha eit kongeleg måltid. Då har dei planar om å rulla ut raud løpar, og servere blomkålsuppe til forrett. Dei har allereie øvd på korleis dei serverer mat til kongen, og snakka mykje om korleis dei trur eit kongeleg måltid er.

Kongeleg middag

Ingeliv Klette Steinsland har øvd ein god del på å vere majestet, det var tydeleg å sjå då Grannar var innom tysdag. Ho sat kongeleg ved eit bordet som ho hadde dekt så flott. Ho hadde samla i saman mat og servise, bore det gjennom rommet. Medan dei andre leika rundt, og nokon gjekk til og frå bordet, sat ho der sirleg og åt så fint av maten ho hadde ordna til.

– Eg er prinsesse dronning av Arendelle, og dette er desserten min, fortel ho medan ho puttar ein sjokoladekjeks i munnen.

Tiara, slott og drakar

Barnehagen har brukt mykje tid på å jobba med temaet kongen». Dei har eit eiget rom i barnehagen der dei har produsert mykje kreativt i høve temaet. I tillegg har dei utstillingar rundt i barnehagen.

— I prosessen med å laga kongeslott, starta dei med å vera ingeniørar sjølv, fortel barnehagelærar Jenny Haraldseid.

Barna fekk i oppgåve å teikna korleis dei ville at slottet skulle sjå ut når dei skulle byggja det. Her kom det mange kreative innspel, men fleire heldt seg ikkje heilt til den opphavlege ideen sin då dei skulle byggja. Både fargar og konstruksjon vart endra, men ifølge barnehagelærar Jenny Haraldseid er dette ein naturleg del av prosessen. Laura Waszkiewicz viser stolt fram dei store slotta i mange flotte fargar som dei har laga av papp.

Etter å ha lese boka om dragejakta», kor ein drake møter ei prinsesse, ville barna teikna drakar. Boka har dei jobba mykje med, og dei har utforska den grundig. I tillegg har dei laga ein plakat om songen Kanskje kommer kongen», der dei har diskutert og utforska alle orda i teksten. Kva er ein perrong? Artisjokk? Her lærde til og med dei vaksne litt. Dei har også gjort seg godt kjend med eventyret om Prinsessa på erta», der alt enda i at dei dramatiserte eventyret.

Alle barna har også fått laga seg kvar sin tiara, som dei stolte ville vise fram.

Vil reise til Ølen

Pedagogisk leiar Wibeche Døvik og barnehagelærar Jenny Haraldseid fortel at dei har planar om at dei eldste i barnehagen skal få vera med på kongebesøket i Ølen den 30. mai, og dei har tru på at dei vil få det til.

– No når me har jobba med dette prosjektet over så lang tid, hadde det vore kjekt å avslutta alt med at dei faktisk får sjå kongeparet, seier Wibeche Døvik.