Det er god stemning mellom festivalleiarane, SLT-koordinator og politiet. Saman ønskjer dei å oppmoda foreldre til å vera tilstades for ungdommane sine når dei går på festival i sommar. F.v: Alf Warloe Christophersen, Skånevik bluesfestival, Ronny Gjermundsen, Vikedal Rootsfestival, Liv Ellen Ebne, SLT-koordinator og Kari Rørtveit, politiet.
Foto: Grethe Hopland Ravn
Nøkkelfaktor for dei unge – er foreldra
Det er snart festivaltid og sjølv om både musikken og moroa skal prega bygdene, ligg det også utfordringar rundt tryggleiken for ungdommane som deltar. — Her er foreldrerolla avgjerande, seier SLT-koordinatoren.
Om sommaren blir både Skånevik og Vikedal forvandla til populære festivalområde, og målet er fest, moro, god musikk og forhåpentlegvis strålande sommarvêr. Likevel ligg det også utfordringar på lur, og det er bakgrunnen for at både festivalsjefane, SLT-koordinator og politiet årleg tar ein prat i forkant av arrangementa.
— Me møtest kvart år der sikkerheit, førebygging og planar er tema, og her blir også ungdommane alltid nemnt. Korleis kan me ta vare på dei på best mogleg måte?, spør Liv Ellen Ebne, som er SLT-koordinator i Etne.
Mindreårige på fest
