Yrke og utdanning
Ein uvanleg veg til suksess
— Ikkje ver redd for å feila, er Sven Ivan Idland Bokn si melding til ungdommane som er på veg ut av reiret. Sjølv gjekk han frå tømrar og brønnborar-draumar til å bli matematikar med masterutdanning og vidare spesialisering innan kunstig intelligens.
Historia til 35-åringen viser at vegen til målet ikkje alltid er rett, og at det er heilt greitt å feila undervegs. Etter grunnskule og ungdomsskule i Skånevik starta Sven Ivan på musikklinja på Stord, driven av kjærleiken til gitaren. Men han oppdaga raskt at det var meir kor enn gitarspel på timeplanen, og interessa dala. Han skifta til VG1 Bygg og anlegg på Stord, og gjekk der eit år. Då han skulle starta på VG2 Tømrarlinja i Ølen, fullførte éin dag før han fann ut at det ikkje var det han ville likevel.
Han satsa heller på litt lengre læretid, og starta som tømrarlærling i Haugesund. Etter eit år i tømrarfaget, droppa han ut, og ville heller prøva seg på teknikk og industriell produksjon på Tesdal i Etne. Då gjekk han med draumar om ein karriere i oljeindustrien.
— Eg fekk ikkje plass på brønnboringslinja i Bergen, sjølv om både rektor og rådgjevar kjempa for meg. På dette tidspunktet hadde eg brukt opp studieretten min, og fekk ikkje plass. Det var eit nederlag, men eg lærte mykje av det, fortel Sven Ivan.
