Yrke og utdanning
Frå lærling til fast jobb
Fagprøven som elektrikar er alt i boks og om ein knapp månad avsluttar han læretida som elektrikarlærling ved Helgevold Elektro. Nå ventar ei fast stilling for 20 år gamle Espen Molnes Lauareid i bedrifta der han har hatt læretida si.
— Eg tok fagprøven i desember og den gjekk bra. Nå har eg fått arbeidskontrakt, seier Espen Molnes Lauareid frå Skånevik godt nøgd over å ha sikra seg jobb i bedrifta han har hatt som læreplass i 2,5 år.
— Eg vil anbefala Helgevold som lærebedrift. Eg har jobba med ein kjekk gjeng, og her får eg opplæring i det eg treng ekstra opplæring i, seier han.
Utdanning til elektrikar er eit yrkesfagleg løp i vidaregåande opplæring med to år skule og 2,5 år som lærling i bedrift i elektrikarfaget. 20-åringen frå Skånevik visste tidleg at han ville satsa på ei utdanning innan faget og etter ungdomsskulen søkte han seg til Ølen vidaregåande skule der han gjekk to år på elektro. Så bar det av garde til elektroentreprenøren i Sandeid og 2,5 år som lærling.
