Vil ta bustadgrep for eldre i Vindafjord
Sentrumsnære og tilrettelagte bustader og oppgradering av eigen bustad er blant verkemidlane som må til for å stå betre rusta mot utfordingane som ventar i framtida når talet på eldre aukar.
Unge eldre i bustad og eldre i omsorgsbustad var tema då Pensjonistforbundet Vindafjord i samarbeid med Vindafjord kommune inviterte til ope møte på Sjøperlo i Ølen. Rundt 80 personar møtte for å høyra kva tankar kommunen har om framtidige bustadløysingar som kan koma både dei eldre til gode og som kan letta kvardagen for tilsette i helse- og omsorgstenesta som i dag kan ha lang reiseveg for å yta hjelp til pleietrengjande.
Kommunalsjef helse og omsorg Sigurd Gjerdevik og kommunalsjef samfunnsutvikling Halfdan Krohn Brekke i Vindafjord kommune orienterte om befolkningsutviklinga både i Noreg og Vindafjord i åra som kjem, og la fram tankar kommunen har for å koma utfordringane i møte.
Annonse
— Fram til nå har me hatt vekst i yrkesaktiv befolkning. Nå flatar det ut. Den yngste del av befolkninga er stabil, men den eldste del aukar fram i tid, sa Gjerdevik og peika på av behovet for helse-og omsorgstenester vil auka dramatisk i åra som kjem samstundes som kommunen i dag har utfordringar med å få tak i tilstrekkeleg kvalifisert personell til å ta seg av den aldrande befolkningsdelen.
— Me må tenkja nytt og då blir bustadutviklinga viktig. Det er viktig å få i gang fleire gode bustadprosjekt, sa han.
Tilrettelagte bustader
Ei av løysingane i møte med alderdomen kan vera å oppgradera eksisterande bustad til livsløpsbustad. Andre løysingar kan vera å byggja fleire aldersvenlege bustader, helst nært kytt opp mot funksjonar som mellom anna butikk, fritidstilbod og ikkje minst heimesjukepleie.
Annonse
— Me vil leggja til rette for tilrettelagte bustader. Dette er eit av dei viktigaste grepa for å sikra framtida, sa Gjerdevik.
Også kommunalsjefen for samfunnsutvikling snakka varmt om bustadsentraleisering, oppgradering og tilrettelegging av eksisterande bustader.
— Om me ikkje gjer noko vil det bringa helse og omsorg i store utfordringar, sa Krohn Brekke.
For å få dette til treng kommunen hjelp både frå den enkelte huseigar og utbyggjar, enten der er bustader for sjølveige eller leige.
— Ny bustad med sentralplassering som ein kan leige kan vera ei av løysingane for å koma utfordringane i møte. Her er Husbanken sentral, sa han.
For å nå måla om fleire og tilrettelagde bustader trengst det kapital som i mange tilfelle må finansierast gjennom lån. Senoirrådgjevar Linda Nordgreen orienterte om moglegheiter for gunstige og langsiktige lån både for private, utbyggjarar og kommunar.
Annonse
Tatt grep
Nestleiar i Pensjonistforbundet Sverre Andersen fortalde om grep han hadde gjort for å letta alderdommen ved å flytta frå eit småbruk med fleire hus til ein lettstelt leilegheit i Ølen, og råda alle som byrja å dra på åra til å vera ute i god tid med å planlegga for alderdommen. Blant tilhøyrarane denne kvelden var to damer frå Ølen og Ølensvåg som hadde gjort nettopp slik Andersen tilrådde. Helene Ohm Berge (77) frå Ølensvåg bur i einebustad med moglegheit for ombygging og Turid Mølstre Haugland (75) frå Ølen flytta til ein einebustad med livsløpstandard alt for 14 år sidan.
— Me ønskjer å bu heime lengst mogleg, fastslår dei to damene.
I løpet av møtet fekk dei frammøtte koma med spørsmål til føredragshaldarane. Ein kasta ut tanken om heller å desentralisera tenestefunksjonane enn å sentralisera dei eldre, medan tidlegare kommuneoverlege Knut Omdal etterlyste fakta kring framtidig sjukeheimskapasitet og føreslo å setja dette på dagsorden ved eventuelle framtidige møter.
— Eg oppfordrar til å halda eit møte om Ølen omsorgssenter, sa han.
