Kari Tønnessen Nordli i Akademikerne Stat skal no representere tenestemannsinteressene i Rikslønsnemnda.

Det vart formelt avgjort i statsråd fredag.

Dette skjer på bakgrunn av at Akademikerne no er den største arbeidstakarorganisasjonen i staten.

– Vi meiner prinsipielt at ikkje-nøytrale medlemmer burde fjernast frå Rikslønsnemnda. Men når ordninga først er som ho er, er det rett at vi får plassen, seier leiar Lise Lyngsnes Randeberg i Akademikerne i ei pressemelding.

Hatt plassen sidan 1952

Det er ei stor forandring i og med at LO Stat og ein representant frå staten har hatt denne plassen sidan 1952.

LO-nestleiar Sissel Skoghaug, som sjølv skal sitje i utvalet i ei anna rolle, reagerer på endringa.

– LO har ein meir mangfaldig medlemsmasse enn Akademikerne, som berre representerer høglønnsgruppene. LO forvaltar frontfagsmodellen på tvers av alle sektorar i samfunnet og kan i større grad sjå heilskapen i lønnsdanninga, seier ho.

Ho seier storleik ikkje bør vurderast lausrive frå breidd og representativitet i medlemsmassen, særleg ikkje når organisasjonane er nesten like store i staten.

– Då bør andre forhold, som representativitet blir vekta tyngre. Vi organiserer medlemmer i alle utdanningsgrupper og i alle sektorar.

Flest medlemmer gjenutnemnde

Rikslønsnemnda er ei fast valdgiftsnemnd som behandlar tvistar mellom tariffpartar om innhaldet i eller skipinga av framtidige tariffavtalar.

Dei fleste medlemmene av Rikslønsnemnda er no gjenutnemnde, blant dei leiar Liv Synnøve Taraldsrud.

– I tillegg møter to faste medlemmer utan stemmerett, som representerer arbeidstakar- og arbeidsgivarinteresser. LOs nestleiar Sissel Merete Skoghaug blir representant for arbeidstakarane i tvistar etter arbeidstvistlova, medan forhandlingsdirektør Jon F. Claudi i NHO skal representere arbeidsgivarane i slike saker, skriv Arbeids- og inkluderingsdepartementet.

(©NPK)