Bygde seg til siger i fylkesfinalen
Linda Eike (17) frå Vats gjekk heilt til topps under fylkesmeisterskapet i tømrarfaget og blei dermed den beste tømrareleven i Rogaland.
— Eg blei litt overraska over å vinna. Alle andre gjorde det bra og eg var redd golvet mitt var litt skeivt, seier Linda Eike etter at ho drog i hamn sigeren i fylkesmeisterskapet for tømrarelevar.
Konkurransen, som blei arrangert av vidaregåande skular i Rogaland, gjekk av stabelen på Gand vgs. i Sandnes. I løpet av ein halv skuledag skulle deltakarane snikra eit bjelkelag og setja opp vegg på to sider med bindingsverk. Meisterskapet var ope for alle vidaregåande skular i fylket og etter ein kvalifiseringsrunde gjekk dei tre beste frå tre skular vidare til finalen.
— Me var til saman åtte deltakarar. Alle i alderen 17 til 18 år, seier Linda som representerte Tryggheim vgs. på Nærbø der ho er elev på andre året.
