Fryktar konsekvensar av nedlegging

— Kombinasjonen av båttilbodet og jobbsituasjonen min gjer at eg kan bu på Bjoa, fortel Ole Talberg.

Han jobbar i Equinor og reiser frå Utbjoa ferjekai til kontoret i Bergen omtrent annakvar veke. Om båten forsvinn, ser han ingen annan utveg enn å flytte tilbake til bustaden sin i Sandnes og jobbe ved Equinor sitt kontor i Stavanger.

Må skifte jobb

Før jul vedtok Rogaland fylkesting at snøggbåtsambandet mellom Bjoa, Ølen, Sunnhordland og Bergen skal leggjast ned i 2025.

Vestland sitt kollektivselskap Skyss driv sambandet, men Rogaland har betalt for at båten skal stoppe i fylket. Etter budsjettvedtaket i Rogaland vedtok Vestland sitt hovudutval for samferdsel og mobilitet 11. mars at båttilbodet i Ølen og Utbjoa skal opphøyre i sommar.

Dette vekker sterke reaksjonar hos Talberg, så vel som Arnfinn Vølstad og Marianne Vee, som pendlar til Aker Solutions på Stord kvar dag. Vølstad seier han må finne seg ein ny jobb om båten blir lagd ned, og Vee vurderer det same.

Forutan jobb, meiner dei at båten er viktig til formål som reiser til Haukeland Universitetssjukehus. No fryktar dei at slike turar vil krevje to overnattingar om ein må bruke buss. Vølstad brukar òg snøggbåten for å komme seg raskt til Flesland flyplass. Han meiner at E39 og E134 åleine ikkje er godt nok for å binde saman dei indre delane av Rogaland og Vestland.

— Båt er det einaste gode alternativet, seier Vølstad.

Utfordrar kommunen

Talberg, Vølstad og Vee meiner at nedlegginga vil gjere det mindre attraktivt å bu i Vindafjord. Vølstad meiner kommunen må ta ei aktiv rolle inn mot fylket og presse på for ei løysing, eventuelt bidra økonomisk. Talberg og Vee håpar Vindafjord kommune vil betale for å redde tilbodet.

— Eg skjønner at Rogaland med sine 23 kommunnar ikkje kan priotere dette, men for Vindafjord er det viktig, seier Talberg.

Han stiller spørsmål ved om ein Sp-styrt kommune, som har oppmoda folk til å flytte heim, no vil la eit 75 år gammalt båttilbod forsvinne. Han viser til at kommunen hadde eit overskot på 61 millionar kroner i 2024, medan tilskotet for Ølensambandet var 1,6 millionar.

Talberg har kontakta kommuneleiinga for å presse på for ei løysing. Han har òg snakka med Lasse Fredheim (H), leiar i samferdselsutvalet i Rogaland, som vil ta opp spørsmålet om kommunal finansiering med Kolumbus, for at dei skal ta det vidare til Vindafjord kommune. Fredheim sende inn spørsmålet før helga, men hadde ikkje fått svar måndag morgon.

Mange oppgåver

Høgre, Venstre, Frp og KrF utgjer fleirtalskoalisjonen i fylkestinget i Rogaland. Fredheim forklarer valet om å ikkje halde fram tilskotet med ein krevjande økonomisk situasjon, der ein blei nøydde til å prioritere Kolumbus sine eigne, meir brukte ruter. Han understrekar at kollektivtransport er eit fylkeskommunalt ansvar, men at det er mogleg for kommunar å bidra om det er sterke lokale ønske.

— Ballen ligg hos Vindafjord, seier Fredheim.

Det finst døme på at kommunar har finansiert kollektivtiltak tidlegare. Stavanger kommune har til dømes betalt for reduserte billettprisar. Fredheim har snakka med lokalpolitikarar i Vindafjord frå Høgre om mogleg kommunal finansiering og planlegg å kontakte ordførar Ole Johan Vierdal (Sp).

Vindafjord-ordføraren har heller ikkje høyrt frå Kolumbus om saka så langt. Spurt om kommunal finansiering av Ølensambandet svarar han at ein aldri skal seie aldri, men er skeptisk til at kommunen skal overta å betale for eit fylkeskommunalt ansvar. Han synest 1,6 millionar er mykje å måtte betale årleg.

— Me har nok å ta tak i om me ikkje òg skal ta fylkeskommunale oppgåver. Pengane kunne me brukt på skule, sjukeheimar og andre av våre ansvarsområde, seier Vierdal.

Ordføraren problematiserer rundt at dersom kommunen skulle ha betalt for dette, kvifor dei ikkje skulle betale for andre fylkeskommunale tilbod som bussar og vidaregåande skule. Han vil ikkje kommentere Talberg sin kritikk av Vindafjord som ein Sp-styrt kommune utover det. Vierdal seier at kommunen heile vegen har prøvd å spele inn til fylket at Ølensambandet bør bli oppretthalde, og kor viktig det er.