Hardt ut mot nedlegging av båt

— Hindrar naudsynt kommunikasjon

I desember vedtok Rogaland fylkesting at snøggbåtsambandet mellom Bjoa, Ølen, Sunnhordland og Bergen skal leggjast ned i 2025. Vestland sitt kollektivselskap Skyss driv sambandet, men Rogaland har betalt for at båten skal stoppe i fylket.

Etter budsjettvedtaket i Rogaland vedtok Vestland sitt hovudutval for samferdsel og mobilitet 11. mars at båttilbodet i Ølen og Utbjoa skal opphøyre i sommar. Vestbø og Sandvik slår fast at Vindafjord kommune er sterkt imot dette.

— Ein slik reduksjon i eit allereie sårbart kollektivtilbod hindrar naudsynt kommunikasjon mellom våre knutepunkt og dei større byane rundt. Det verken støttar opp under eller gir moglegheiter for å vidareutvikle dei levande bygdene i kommunen, skriv dei.

Kommunen har hatt kontakt med mange reisande i Vindafjord, Etne, Sauda og Ryfylke som nyttar desse indre reiserutene som ei mogleg pendlarrute. For fleire betyr nedlegginga at dei ikkje kan halde fram i jobben sin, og nokre vurderer å flytte frå kommunen.

Vil ha ny behandling

E39 er ifølgje Sandvik og Vestbø ikkje ei effektiv transportåre mellom Bergen og Stavanger for dei indre områda i begge fylka. Dei meiner at nedlegginga av hurtigbåttilbodet vil fjerne ein god og tidseffektiv kommunikasjonsveg mellom Bergen, Ølen og vidare til Stavanger.

Det er etter Vestbø og Sandvik si oppfatning svært uheldig at ei så viktig samankopling mellom indre område i Rogaland fylke og indre område i Vestland fylke mellom byane Stavanger og Bergen blir avgjort i oppdelte vedtak der finansieringa blir avgjort aleine i Rogaland fylke og dermed forslag om etterfølgjande avvikling av tilbodet i Vestland fylke.

— Dersom Vestland fylke ikkje kan oppretthalde rutetilbodet utan finansiering frå Rogaland, ber Vindafjord kommune om at saka blir utsett og på nytt sett på i heilskap i begge fylka, skriv Sandvik og Vestbø.

Dei meiner at ruta bør vurderast som ein viktig transportåre mellom Stavanger og Bergen, ikkje berre ei rute med få passasjerar i kvar ende av fylket.

Blei ikkje tatt med

Då Vindafjord kommune blei klar over saka i Vestland, hadde ho allereie vore behandla i hovudutvalet for samferdsel og mobilitet. I saksutgreiinga står det at Vestland fylkeskommune ikkje såg det som nødvendig å innhente uttale frå Vindafjord.

Denne vurderinga får Sandvik og Vestbø til å reagere. Dei viser til at saka tilrår ei ruteendring der tilbodet til Ølen og Utbjoa fell bort, samstundes som tilbodet internt i Vestland blir ivareteke. Alle endringane skjer i Vindafjord, medan ingen fysiske ruteendringar skjer i kommunane Etne, Kvinnherad og Stord. Saker skal etter forvaltningslova sendast til uttale til berørte partar.

— Her er det særleg Vindafjord som er berørt, men ho er utelaten frå høyringa, skriv einingsleiaren og rådgivaren.

Ifølgje kommunen kan ikkje saka behandlast i fylkesutvalet 8. april utan at Vindafjord har fått høve til å uttale seg. Vindafjord kommune har etter kontakt med Vestland fylkeskommune fått høve til å sende ei uttale i saka, noko som blei avklart 28. mars. Vestbø og Sandvik skriv at kommunen måtte sende denne uttalen 31. mars, og at det difor ikkje var mogleg å ha uttalen oppe til politisk behandling. Sidan formannskapet så seint som 4. november 2024 kom med ei samla uttale mot kuttforslaga, er det vurdert som gjeldande politisk òg for denne uttalen.

Frå politikarane sitt vedtak:

Dårleg lagt til rette

Sandvik og Vestbø viser til at i begge fylka blir synkande passasjertal vurdert som eit teikn på at det ikkje er behov for båtruta. Synkande passasjertal må etter deira oppfatning løysast med ei auke i rutetilbodet, ikkje reduksjon.

— Det er langt meir logisk å konkludere med at reduksjon i passasjertal kjem av eit for dårleg rutetilbod enn at det ikkje er behov for båtruta, skriv einingsleiaren og rådgivaren.

Dårleg korrespondanse mellom buss og båt gjer det òg vanskelegare for folk å bruke kollektivtransport. Dei trekker fram Utbjoa som eit eksempel: Kolumbus køyrer ein buss på fylkesveg 4736 frå Vikebygd via Utbjoa til Ølen på fylkesveg 543, men han stoppar ikkje dei 650 metrane ned til kaien. Dermed er det ikkje mogleg å reise med bussen og nå båten – eller omvendt.