Fysioterapeutane Anna Sørum (t.v.) og Gunvor Johansson Garvik skal leie temakvelden.
FOTO: PRIVAT
Vil hjelpe til med å få livet i balanse
Etne og Vindafjord Mental Helse inviterer til temakveld om kvardagsaktivitet og psykisk helse komande torsdag kveld. Fysioterapeut Gunvor Johansson Garvik ser fram til å leie kvelden saman med kollega Anna Sørum.
— Me kjem til å snakke litt generelt om fysisk aktivitet og korleis det påverkar både fysisk og psykisk helse. Blant anna kjem me til å ta for oss korleis ein kan få inn fysisk aktivitet i eit travelt liv, seier fysioterapeut Gunvor Johansson Garvik.
Temakvelden blir arrangert i kafeen på Sjøperlo i Ølen og er open for alle. Dette er Johansson Garvik og kollega Anna Sørum sitt første oppdrag i regi av Frisklivssentralen, som startar opp si første gruppe i veke 17 (veka etter påske).
Arrangementet er gratis. Ein melder seg på ved å kontakte Sølvi Eide Lunde, og det er ikkje noko påmeldingsfrist.
