AdmMit vann kåringa
Kåringane var rosinene i pølsa på konferansen NæringsGIV på Olalia i dag. Årets bedrift vart AdmMit AS. Årets gründer vart Larsen Bakeri AS. I den nye klassen, årets nykomar, vart vinnaren Sandvik Service Solutions AS
Som vanleg er det dei lokale bankane som saman med Fikse Næringsforening er jury og deler ut prisane. Sparebanken Norge var representert med Magnhild Gravelsæter Våge, Haugesund Sparebank var der med Lars Olav Larsen og SpareBank1 Sør-Norge med Anders Hundseid.
Årets bedrift 2025
Annonse
Dei nominerte var Bjarne Nordtveit AS i Øvre Vats, AdmMit AS i Sandeid og Lauareid Service i Skånevik.
Det var AdmMit AS som strakk det lengste strået. Seriegründer og eigar Rune Furseth tok imot prisen. Lars Olav Larsen i Haugesund Sparebank understreka at verksemda er kjent for god service og djup kunnskap om eigenutvikla løysingar på ein nasjonal marknad.
Årets gründer 2025
Dei nominerte var Silde AS i Etne, Vindafjord Biovarme DA i Skjold og Larsen Bakeri AS i Skånevik.
Annonse
Årets gründer blei Larsen Bakeri AS. Janne Larsen Sævareid påpeika med eit stort smil at det er spesielt at ei familieverksemd gjennom generasjonar får pris som gründer, men argumentasjonen frå juryen var at ho har tilpassa bakeriet i ei tid kor det er typisk at slike verksemder slit.
Magnhild Gravelsæter Våge gir her gründerprisen til Janne Larsen Sævareid. Anders Hundseid og Lars Olav Larsen (delvis skjult) bak.
Årets nykomar
Nominert var Prefabpartner AS i Ølen, Sandvik Service Solutions AS i Skjold og Havreberg Coaching i Etne,
Vinnaren vart Sandvik Service Solutions AS. Gründer og eigar, Per Inge Sandvik tok imot prisen etter å ha høyrt juryen si vurdering om at verksemda leverer høg kvalitet gjennom eit sterkt lag tilsette. Vikedalsbuen Per Inge Sandvik har seinare år flytta verksemda frå Vikedal, via Nedre Vats, til Skjold.
Annonse
Den nye leiaren av Fikse Næringsforening, Stian Skarheim Magelssen, var ein utmerka konferansier for konferansen som Grannar kjem tilbake til i ein eigen artikkel.
