- lokalavisa for Vindafjord og Etne
— Eg er utruleg stolt av ho, seier Audun Haddal.
Haddal starta eit innbyggjarinitiativ mot nedlegginga for innbyggjarar i Vestland fylkeskommune. I initiativet skriv han at han gjorde dette på grunn av engasjementet til dottera, som skreiv eit lesarinnlegg i Grannar.
— Ho nekta å gje seg utan kamp! Inspirert av dottera mi ønskjer eg no å gjera det same, skriv Haddal.
Sofie Helene Fresvik (10) sitt lesarinnlegg:
Ølensambandet har gjort det mogleg for Sofie Helene Fresvik (10), som bur i Ølen, å besøkje faren i Bergen annakvar helg. Politiske vedtak på fylkesnivå i Vestland og Rogaland gjer at det no ser ut til at det berre er nokre veker til snøggbåten til Bergen og Sunnhordland sluttar å vere innom Ølen, så vel som Utbjoa. Vestland sitt kollektivselskap Skyss driv sambandet, men Rogaland har betalt for at båten skal stoppe i fylket.
På nettsida si skriv Skyss at det frå 1. juli blir ruteendringar på Sunnhordlandsruta. Blant anna står det at Ølen og Utbjoa ikkje lenger blir trafikkerte, og at reisande frå desse områda må vurdere alternative reiseruter.
I Rogaland starta Aslaug Johanne Risøy eit innbyggjarinitiativ 4. juni. Same dag nådde det dei 500 underskriftene som trengst for å bli behandla politisk. Fredag var talet oppe i 885 underskrifter.
Same dag som Risøy starta, lanserte også Haddal sitt initiativ for innbyggjarar busette i Vestland. Søndag nådde det 500, og etter kvart 550 signaturar.
— At me har klart å lage to underskriftskampanjar som har nådd 500 underskrifter, er fantastisk. Det gir meg håp om at me kan redda båten, seier Haddal.
Risøy fortel at ho vil ta kontakt med begge fylkeskommunane denne veka.
