Reaksjonar på vegplanane i Skånevik
Over 30 grunneigarar møtte opp då fylket inviterte til informasjonsmøte om oppgradering av vegen mellom Skånevik og Nesvågen. For nokre betyr planane at hus og eigedom blir dramatisk endra – for Bodil og Normann Martinusen kan det koste dei både låven og store delar av hagen.
Ekteparet Bodil og Normann Martinusen var til stades under informasjonsmøtet om ny veg. Der var det dessverre lite nytt i positiv retning for dei som risikerer å miste verdifulle delar av eigedomen sin.
— Eg synest det er sørgeleg at låven skal takast, seier Bodil Martinusen. Ho og ektemannen Normann er blant dei som blir sterkast råka når den nye fylkesvegen mellom Skånevik og Nesvågen skal byggjast.
Den nye vegen vil gå rett gjennom låven deira – ein bygning far til Bodil ein gong bygde, og som i ein periode romma ein skaftefabrikk. No er låven renovert og blir brukt flittig når familie og venner samlast.
